लहाने यांच्या उमेदवारीने अमरावती शिक्षक मतदारसंघात राजकीय समीकरणांना नवी दिशा

बुलढाणा

 अमरावती विभागीय शिक्षक मतदारसंघाच्या आगामी निवडणुकीच्या पार्श्वभूमीवर शिवसेना (उद्धव बाळासाहेब ठाकरे) पक्षाने बुलढाण्यातील प्रा. डी. एस. लहाने यांना उमेदवारी देत राजकीय मैदानात आपली भूमिका स्पष्ट केली आहे. पक्षप्रमुख उद्धव ठाकरे यांनी लहाने यांच्या नावाला मंजुरी दिल्याने अमरावती शिक्षक मतदारसंघातील निवडणुकीला आता राजकीय रंग चढण्याची शक्यता आहे.

शिक्षक मतदारसंघाची निवडणूक काही महिन्यांवर येऊन ठेपली असतानाच विविध राजकीय पक्षांकडून संभाव्य उमेदवारांच्या हालचालींना वेग आला आहे. अशा परिस्थितीत उबाठाने बुलढाण्यातील लहाने यांच्यावर विश्वास दाखवणे हे केवळ उमेदवारी जाहीर करण्यापुरते मर्यादित नसून, शिक्षक मतदारांमध्ये पक्षाची संघटनात्मक पकड मजबूत करण्याच्या दृष्टीने महत्त्वाचे पाऊल मानले जात आहे.

लहाने हे यापूर्वीच या मतदारसंघासाठी इच्छुक असल्याचे स्पष्ट झाले होते. गेल्या काही काळापासून त्यांनी मतदारसंघात संपर्क वाढवून राजकीय मोर्चेबांधणीला सुरुवात केली होती. अखेर पक्षश्रेष्ठींनी त्यांच्या नावावर शिक्कामोर्तब केल्याने त्यांच्या समर्थकांमध्ये उत्साहाचे वातावरण निर्माण झाले आहे.

या उमेदवारीमुळे आता अमरावती शिक्षक मतदारसंघात उबाठा विरुद्ध अन्य राजकीय शक्ती असा संभाव्य संघर्ष रंगण्याची चिन्हे आहेत. विशेषतः शिक्षक मतदारांचा कल, संघटनांची भूमिका आणि विविध पक्षांच्या संभाव्य उमेदवारांची ताकद यावर निवडणुकीचे गणित अवलंबून राहणार आहे.

लहाने यांच्या उमेदवारीच्या निर्णयावेळी शिवसेना नेते खासदार अरविंद सावंत, विनायक राऊत, खासदार अनिल देसाई, आमदार ज. मो. अभ्यंकर यांच्यासह बुलढाणा जिल्हाप्रमुख जालिंधर बुधवत, संपर्कप्रमुख नरेंद्र खेडेकर, प्रवक्त्या जयश्रीताई शेळके आदी पदाधिकारी उपस्थित होते.

दरम्यान, लहाने यांच्या उमेदवारीनंतर बुलढाणा जिल्ह्यातील उबाठाच्या राजकीय हालचालींनाही वेग येण्याची शक्यता आहे. शिक्षक मतदारसंघाच्या निवडणुकीत ही उमेदवारी उबाठासाठी कितपत फायदेशीर ठरते आणि लहाने यांच्या माध्यमातून पक्ष मतदारसंघातील राजकीय समीकरणे कितपत बदलू शकतो, याकडे आता राजकीय वर्तुळाचे लक्ष लागले आहे.