लोणार

लोणार शहरातील नागरिकांसाठी जय कमळजा महिला अर्बन रोजगार राजस्थानी समाज व जैन समाज रोजगार, सुबोध युवक कल्याण मंडळ डोंगरगाव परिसर आणि सप्तता सुबोध सावजी चॅरिटेबल ट्रस्ट, मुंबई यांच्या सहकार्याने एक्युप्रेशर, सुजोक व व्हायब्रेशन थेरपी शिबिराचे आयोजन करण्यात आले आहे. रविवार, १६ ऑगस्ट ते शुक्रवार, २१ ऑगस्ट २०२६ या कालावधीत हे सहा दिवसीय शिबिर आयोजित करण्यात आले आहे.

शिबिराचे आयोजन लोणार शहरातील आदित्य मेडिकलच्या बाजूला, जय कमळजा पेट्रोल पंपासमोर करण्यात आले आहे. सकाळी ६ ते दुपारी १२ आणि दुपारी ४ ते रात्री ८ या वेळेत नागरिकांना उपचार व मार्गदर्शनाचा लाभ घेता येणार आहे. शिबिरासाठी सहा दिवसांची नोंदणी फी २०० रुपये असून उपचार मोफत असल्याचे आयोजकांनी सांगितले आहे.

विविध आजारांवर उपचाराचा दावा

जोधपूर (राजस्थान) येथील एक्युप्रेशर रिसर्च ट्रेनिंग व ट्रीटमेंट संस्थेच्या तज्ज्ञांच्या मार्गदर्शनाखाली हे शिबिर होणार आहे. आयोजकांच्या माहितीनुसार, गुडघेदुखी, लठ्ठपणा, कंबरदुखी, कळ, गॅस-कब्ज, सर्व्हायकल दुखणे, सांधेदुखी, पाठदुखी, सायटिका, डोकेदुखी, डोळ्यांच्या समस्या, थायरॉईड, टक्कल (एलोपेशिया), मणक्याच्या समस्या, मानसिक ताण, हात-पायांमध्ये मुंग्या येणे तसेच व्हेरिकोज व्हेन्स आदी समस्यांसाठी एक्युप्रेशर, सुजोक व व्हायब्रेशन थेरपीद्वारे उपचार व मार्गदर्शन केले जाणार असल्याचे पत्रकात नमूद करण्यात आले आहे.

या शिबिरासाठी थेरपिस्ट म्हणून थेरपिस्ट राजेंद्र सारण आणि थेरपिस्ट सी.आर. चौधरी यांची नावे देण्यात आली आहेत. नोंदणीसाठी पवन शर्मा, किशोर मापारी आणि अनिल संचती यांच्याशी संपर्क साधण्याचे आवाहन करण्यात आले आहे.

शिबिराचा लोणार शहरातील नागरिकांनी लाभ घ्यावा, असे आवाहन आयोजकांच्या वतीने करण्यात आले आहे. यासाठी नगराध्यक्षा सौ. मिराबाई भूषण मापारी यांच्या शुभेच्छा असल्याचेही शिबिराच्या पत्रकात नमूद करण्यात आले आहे.