धामणगाव बढेच्या उर्दू शाळेला आठ शिक्षकांची प्रतीक्षा
५४८ विद्यार्थ्यांचा भार अपुऱ्या शिक्षकांवर; पवित्र पोर्टलच्या तिसऱ्या टप्प्यातून भरती करण्याची मागणी

धामणगाव बढे
मोताळा तालुक्यातील धामणगाव बढे येथील जिल्हा परिषद उर्दू उच्च प्राथमिक शाळेतील शिक्षकांची रिक्त पदे विद्यार्थ्यांच्या शिक्षणाच्या दृष्टीने चिंतेचा विषय ठरत आहेत. तब्बल ५४८ विद्यार्थी शिक्षण घेत असलेल्या या शाळेत आवश्यक शिक्षक उपलब्ध नसल्याने अध्यापन व्यवस्थेवर ताण येत आहे. ही परिस्थिती लक्षात घेता पवित्र पोर्टलच्या तिसऱ्या टप्प्यातून आठ शिक्षकांची नियुक्ती करावी, अशी मागणी शाळा व्यवस्थापन समितीचे उपाध्यक्ष जमीर इमाम कुरेशी यांनी शिक्षणाधिकारी (प्राथमिक), जिल्हा परिषद बुलढाणा यांच्याकडे निवेदनाद्वारे केली आहे.
शैक्षणिक वर्ष २०२६-२७ मधील पटसंख्येनुसार शाळेत २१३ मुले आणि ३३५ मुली असे एकूण ५४८ विद्यार्थी आहेत. शाळेसाठी १७ शिक्षकांची पदे मंजूर असली, तरी प्रत्यक्षात उपलब्ध शिक्षकांची संख्या कमी आहे.
इयत्ता पहिली ते पाचवीमध्ये ३७२ विद्यार्थी असून, या वर्गांसाठी मंजूर ११ पदांपैकी केवळ सहा शिक्षक कार्यरत आहेत. त्यामुळे पाच शिक्षकांची आवश्यकता आहे. सहावी ते सातवीच्या वर्गांमध्ये १७६ विद्यार्थी शिकत असून, मंजूर पाच पदांपैकी दोनच शिक्षक उपलब्ध आहेत. या स्तरावर आणखी तीन शिक्षकांची गरज आहे. अशा प्रकारे शाळेला एकूण आठ शिक्षकांची आवश्यकता असल्याचे निवेदनात स्पष्ट करण्यात आले आहे. शिक्षकांची कमतरता कायम राहिल्यास नियमित अध्यापन, अभ्यासक्रम पूर्ण करणे आणि विद्यार्थ्यांची शैक्षणिक गुणवत्ता यावर परिणाम होण्याची शक्यता आहे. प्रत्येक विद्यार्थ्याला पुरेसे मार्गदर्शन आणि गुणवत्तापूर्ण शिक्षण मिळण्यासाठी रिक्त पदे तातडीने भरणे गरजेचे असल्याचे समितीने नमूद केले आहे. या प्रश्नावर १४ ऑक्टोबर २०२६ रोजी झालेल्या शाळा व्यवस्थापन समितीच्या बैठकीत सविस्तर चर्चा करण्यात आली. त्यानंतर ठराव क्रमांक चार मंजूर करून पवित्र पोर्टलच्या तिसऱ्या टप्प्यातून आठ शिक्षक उपलब्ध करून देण्याची मागणी शिक्षण विभागाकडे करण्यात आली.
विद्यार्थ्यांचे शैक्षणिक नुकसान होऊ नये, यासाठी शिक्षण विभागाने या मागणीची गांभीर्याने दखल घेऊन तातडीने शिक्षक नियुक्त करावेत, अशी अपेक्षा जमीर इमाम कुरेशी यांनी व्यक्त केली आहे. निवेदनाच्या प्रती जिल्हा परिषदेचे मुख्य कार्यकारी अधिकारी तसेच मोताळा पंचायत समितीचे गटशिक्षणाधिकारी यांनाही पाठविण्यात आल्या आहेत.




