पेनटाकळीच्या पाण्याचा तिढा कायम; शेतकऱ्यांची प्रतीक्षा संपेना!
नेत्यांच्या बैठकांमागून बैठका, आंदोलन आणि उपोषणही झाले; मात्र हळद, तूर उत्पादकांना अद्याप दिलासा नाही

बुलडाणा
मेहकर तालुक्यातील पेनटाकळी धरणातून खरीप पिकांसाठी पाणी सोडण्याचा प्रश्न अद्याप मार्गी लागलेला नाही. गेल्या काही दिवसांपासून या मागणीवरून जिल्ह्यात राजकीय घडामोडींना वेग आला आहे. विविध पक्षांच्या नेत्यांनी आंदोलन, उपोषण, मोर्चे आणि प्रशासकीय बैठकांच्या माध्यमातून पाणी सोडण्यासाठी दबाव निर्माण केला. पालकमंत्र्यांच्या अध्यक्षतेखाली ऑनलाइन बैठकही पार पडली. मात्र, या सर्व प्रयत्नांनंतरही धरणातून पाणी सोडण्याबाबत अंतिम निर्णय झाल्याचे स्पष्ट झालेले नाही. त्यामुळे हळद आणि तूर उत्पादक शेतकऱ्यांची पाण्यासाठीची प्रतीक्षा कायम आहे.
पेनटाकळी धरणातून पाणी सोडण्याच्या मागणीवरून सत्ताधारी आणि विरोधी पक्षांतील नेत्यांनी आपापल्या स्तरावर पाठपुरावा सुरू केला आहे. केंद्रीय राज्यमंत्री प्रतापराव जाधव, भाजप आमदार श्वेता महाले, मेहकरचे माजी आमदार संजय रायमुलकर आणि उबाठाचे आमदार सिद्धार्थ खरात यांनी या प्रश्नावर वेगवेगळ्या माध्यमांतून भूमिका मांडली. मात्र, एकाच मागणीसाठी सुरू असलेल्या या प्रयत्नांमध्ये राजकीय श्रेय घेण्याची चढाओढही चर्चेचा विषय ठरली आहे. पेनटाकळी धरणात पुरेसा पाणीसाठा असल्याचा दावा करीत पैनगंगा नदीपात्रात पाणी सोडण्याची मागणी करण्यात येत आहे. खरीप हंगामातील हळद आणि तूर या पिकांना सध्या पाण्याची गरज असल्याने शेतकऱ्यांनीही या मागणीला पाठिंबा दिला आहे. या प्रश्नासाठी माजी आमदार संजय रायमुलकर यांनी नदीपात्रात उतरून आमरण उपोषण केले. तर आमदार सिद्धार्थ खरात यांनी धरणावर मोर्चा काढत पाणी सोडण्याची मागणी आक्रमकपणे लावून धरली.
दुसरीकडे केंद्रीय राज्यमंत्री प्रतापराव जाधव यांनी जिल्हाधिकारी व संबंधित प्रशासनाकडे पाठपुरावा करीत पाणी सोडण्याबाबत निर्णय घेण्याची मागणी केली. भाजप आमदार श्वेता महाले यांनीही धरणातील पाण्याच्या वापराबाबत सर्वांना समान न्याय मिळावा, अशी भूमिका मांडली. या सर्व घडामोडींमुळे पेनटाकळीच्या पाण्याचा प्रश्न राजकीय पातळीवरही ऐरणीवर आला आहे.
या पार्श्वभूमीवर जिल्हाधिकारी कार्यालयात प्रशासकीय बैठकांचे सत्र सुरू झाले. मात्र, त्यातूनही निर्णय न झाल्याने पालकमंत्र्यांच्या अध्यक्षतेखाली ऑनलाइन बैठक घेण्यात आली. या बैठकीत पाणीटंचाई आणि चारा नियोजनासह विविध विषयांवर चर्चा झाल्याची माहिती आहे. तथापि, पेनटाकळी धरणातून खरीप पिकांसाठी पैनगंगा नदीपात्रात पाणी सोडण्याबाबत नेमका काय निर्णय झाला, याबाबत अद्याप स्पष्टता आलेली नाही.
एकीकडे पावसाच्या कमतरतेमुळे शेतकरी आर्थिक संकटाचा सामना करीत आहेत, तर दुसरीकडे हळद आणि तूर पिकांना आवश्यक पाणी मिळत नसल्याने पिकांच्या भवितव्याबाबत चिंता वाढली आहे. राजकीय स्तरावर बैठकांचे आणि आंदोलनांचे सत्र सुरू असले, तरी प्रत्यक्ष पाणी शेताच्या बांधापर्यंत कधी पोहोचणार, हा प्रश्न अनुत्तरित आहे. त्यामुळे प्रशासनाने विलंब न करता पाणी सोडण्याबाबत स्पष्ट निर्णय जाहीर करावा, अशी अपेक्षा शेतकरी व्यक्त करीत आहेत.
राजकीय श्रेयवादात शेतकऱ्यांचा पाणीप्रश्न मागे
पेनटाकळी धरणातून पाणी सोडावे, या मागणीवर सर्वपक्षीय नेत्यांचे एकमत दिसत असले, तरी या मागणीचे श्रेय कोणाला मिळणार, यावरून राजकीय स्पर्धा सुरू असल्याची चर्चा आहे. कोणी उपोषणाच्या माध्यमातून, कोणी मोर्चाद्वारे, तर कोणी प्रशासकीय पाठपुराव्याने प्रश्न सोडविण्याचा प्रयत्न करीत आहे. मात्र, या राजकीय घडामोडींपेक्षा शेतकऱ्यांसाठी पाणी कधी उपलब्ध होणार, हे अधिक महत्त्वाचे आहे. त्यामुळे श्रेयवाद बाजूला ठेवून सर्व नेत्यांनी एकत्रितपणे निर्णयासाठी प्रयत्न करण्याची गरज व्यक्त होत आहे.
हळद, तूर पिकांना पाण्याची प्रतीक्षा
मेहकरसह परिसरातील शेतकऱ्यांनी हळद आणि तूर पिकांची लागवड केली आहे. पावसाने ओढ दिल्याने जमिनीतील ओलावा कमी झाला असून, पिकांच्या वाढीसाठी पाण्याची आवश्यकता निर्माण झाली आहे. अशा परिस्थितीत पेनटाकळी धरणातून पैनगंगा नदीपात्रात पाणी सोडल्यास परिसरातील शेतकऱ्यांना दिलासा मिळू शकतो. मात्र, निर्णयाला होत असलेल्या विलंबामुळे पिकांचे नुकसान होण्याची भीती शेतकऱ्यांना सतावत आहे.



