खळबळजनक ; रायपूर मध्ये अफगाणिस्तान, बिस्तर पर जाना, पुराना’ नावाचे मतदार
चिखली
चिखली विधानसभा मतदारसंघातील रायपूर गावाच्या मतदार यादीत काही अत्यंत संशयास्पद आणि विचित्र स्वरूपाच्या नोंदी आढळल्याने एकच खळबळ उडाली आहे. मतदार यादीत “मोहम्मद अफगाणिस्तान”, “बिस्तर पर जाना” आणि “पुराना” अशा नावांच्या नोंदी दिसून आल्या असलयाचा उलगडा आज करण्यात आला आहे.
स्थानिक नागरिकांच्या म्हणण्यानुसार, या नावांच्या व्यक्ती गावात अस्तित्वात असल्याची माहिती कोणालाही नाही. त्यामुळे या नोंदींची तातडीने सखोल चौकशी करून सत्य परिस्थिती जनतेसमोर आणावी, अशी मागणी चिखली विधानसभा मतदारसंघाच्या आमदार श्वेता महाले पाटील यांनी केली आहे.
रायपूर या गावात मागील अनेकवर्षापासून मतदार यादीची पडताळणीच करण्यात आली नाही. आता एसआयआरचे काम सुरु असल्याने मतदार यादीचा अभ्यास केला जातो आहे. दरम्यान या गावात विचित्र नावाचे बोगस मतदार असल्याची खळबळनजक माहिती आता समोर आली आहे. यावर चिखलीच्या आमदार श्वेता महाले यांनी अक्षेप नोंदवला आहे. दरम्यान अशा प्रत्येक प्रकरणाची निवडणूक आयोगाने निष्पक्ष व सखोल चौकशी करणे आवश्यक असल्याची मागणी केली आहे. मतदार यादीतील अशा नोंदी आढळल्यास त्यावर केवळ चर्चा करून थांबणे पुरेसे नाही. नागरिकांनी आपल्या गावातील मतदार यादी काळजीपूर्वक तपासावी. एखादी नोंद संशयास्पद वाटल्यास त्याबाबत आवश्यक पुराव्यांसह निवडणूक नोंदणी अधिकारी किंवा निवडणूक आयोगाकडे हरकत नोंदवावी. योग्य पडताळणी झाल्यानंतरच अशा नोंदींबाबत अंतिम निर्णय होऊ शकतो. आ. महाले यांनी स्पष्ट केले की, भारतीय लोकशाहीमध्ये मताधिकार हा केवळ पात्र भारतीय नागरिकांचाच अधिकार आहे. त्यामुळे मतदार यादीतील प्रत्येक नावाची शहानिशा होणे आवश्यक आहे. कोणत्याही प्रकारच्या चुकीच्या किंवा बनावट नोंदींना स्थान राहू नये, यासाठी नागरिकांनीही सक्रिय सहभाग घ्यावा.
रायपूर गावातील या प्रकरणाची संबंधित निवडणूक अधिकाऱ्यांनी तातडीने चौकशी करून वस्तुस्थिती स्पष्ट करावी आणि आवश्यक असल्यास दोषी आढळणाऱ्यांवर कायदेशीर कारवाई करावी, अशी मागणीही आ. श्वेता महाले पाटील यांनी केली आहे.
