लोणार पंचायत समितीमध्ये ‘बायोमेट्रिक’ बसवा; लेटलतीफ कारभारामुळे नागरिक त्रस्त
लोणार | प्रतिनिधी
यैथील पंचायत समितीमधील अनेक अधिकारी आणि कर्मचारी वेळेवर कार्यालयात उपस्थित राहत नसल्याने ग्रामीण भागातून येणाऱ्या नागरिकांची कामे खोळंबत आहेत. कर्मचाऱ्यांच्या या अनियंत्रित हजेरीला चाप लावण्यासाठी प्रशासनाने पंचायत समितीमध्ये तसेच पंचायत समिती मध्ये येणाऱ्या सर्व विभागात तातडीने बायोमेट्रिक हजेरी प्रणाली कार्यान्वित करावी, अशी आग्रही मागणी लोणार तालुक्यातील ग्रामस्थांनी केली आहे.
लोणार तालुका हा भौगोलिकदृष्ट्या मोठा असून, विविध शासकीय योजनांच्या कामासाठी नागरिक दुरून पंचायत समितीमध्ये येतात. मात्र, अनेकदा कर्मचारी वेळेवर उपलब्ध नसतात किंवा मॅन्युअल हजेरी पटावर सह्या करून बाहेर फिरत असतात. यामुळे सामान्य जनतेचा वेळ आणि पैसा वाया जात आहे. तळोदा आणि साक्री यांसारख्या इतर पंचायत समित्यांमध्ये असाच प्रश्न निर्माण झाला असताना तेथे बायोमेट्रिक सक्तीचे आदेश देण्यात आले आहेत, त्याच धर्तीवर लोणारमध्येही कारवाईची अपेक्षा व्यक्त होत आहे.
हजेरीतील पारदर्शकता – बायोमेट्रिक मशीनमुळे कर्मचाऱ्यांच्या येण्या-जाण्याच्या वेळेची अचूक नोंद राहील, ज्यामुळे कामात शिस्त येईल.
वेळेची बचत: कर्मचारी वेळेवर उपस्थित राहिल्यास नागरिकांना एकाच कामासाठी वारंवार चकरा माराव्या लागणार नाहीत.
प्रशासकीय वचक: कर्तव्यात कसूर करणाऱ्या आणि विनापरवाना गैरहजर राहणाऱ्या कर्मचाऱ्यांवर या प्रणालीमुळे प्रशासकीय नियंत्रण मिळवणे सोपे जाईल.
शासकीय नियमांचे उल्लंघन: राज्य शासनाने शासकीय कार्यालयांमध्ये बायोमेट्रिक हजेरी सक्तीची केली असतानाही लोणारमध्ये याची अंमलबजावणी का होत नाही, असा सवाल नागरिक उपस्थित करत आहेत.
